Pumanaw na si Pilita Corrales, kilala bilang "Asia's Queen of Songs", sa edad na 87, ayon sa post ng kanyang anak na si Jackielou Blanco sa Instagram. Ayon kay Jackielou, si Pilita ay hindi lang isang sikat na singer kundi isa ring loving na ina at lola na maraming na-touch na buhay.
Sikat si Pilita hindi lang sa Pilipinas, kundi pati sa Australia at America, kung saan siya unang sumikat sa kantang "Come Closer To Me". Siya ang unang Filipina na umabot sa Australian pop charts, at nagkaroon pa siya ng street na ipinangalan sa kanya sa Victoria.
Pagbalik niya sa Pilipinas noong 1963, naging sikat siya sa TV at concerts, at nakasama pa ang mga international stars tulad nina Frank Sinatra, The Beatles, at Sammy Davis Jr. Isa rin siya sa mga unang Filipina na nakapag-perform sa Caesar's Palace sa Las Vegas.
Bukod sa pagkanta, naging aktres, host, songwriter, at judge din siya sa X Factor Philippines noong 2012. Ang signature song niyang "A Million Thanks to You" ay isinalin pa sa 7 languages at naging bahagi na ng OPM history.
Hanggang sa kanyang huling mga taon, tuloy pa rin si Pilita sa pag-perform at pag-share ng kanyang talento. Sa katunayan, gumagawa pa ng documentary tungkol sa kanyang buhay sina Janine Gutierrez at Baby Ruth Villarama para sa Cannes Producer’s Network. Isa siyang tunay na icon ng OPM at hindi makakalimutan.
