Tinawag ng Department of the Interior and Local Government (DILG) na isang "Chinese laban sa Chinese" na krimen ang pagdukot sa isang estudyanteng Chinese sa Taguig City. Nawawala ang bata mula noong Pebrero 20 matapos siyang lumabas sa paaralan, ngunit hindi siya at ang kanyang driver nakauwi. Natagpuan ang kanilang sasakyan sa C-5 Road, at kinabukasan, natagpuan din sa Bulacan ang bangkay ng driver, dahilan para alisin siya bilang suspek. Sa loob ng sasakyan, may nakuhang mga larawan, usapan, at cellphone numbers na ginamit ng mga awtoridad para matunton ang mga kidnappers.
Noong una, humingi ng $20 million ransom ang mga kidnappers pero kalaunan ay bumaba ito sa $1 million. Noong Pebrero 22, nagpadala sila ng video kung saan pinutol nila ang isang daliri ng bata. Kinabukasan, nagpadala ulit sila ng video kung saan kumakanta ang bata ng paboritong kanta ng kanyang kapatid bilang proof of life. Ayon kay DILG Secretary Jonvic Remulla, mukhang nasa maayos na kalagayan ang bata kahit may tinamong pinsala.
Sinundan ng Philippine National Police Anti-Kidnapping Group (PNP-AKG) ang signal ng isa sa mga cellphone ng kidnappers noong Pebrero 24, ngunit natuklasan nilang nasa ibang lugar ang signal kumpara sa aktwal na kinaroroonan ng bata. Noong Pebrero 25, nahanap nila ang tamang signal mula sa isang moving vehicle. Habang tinutugis ito, napansin nila ang isang batang nakatayo sa gitna ng kalsada sa Parañaque, nakapajama, at may benda sa kamay. Pinili ng PNP-AKG na iligtas ang bata imbes na habulin ang sasakyan.
Ayon kay PNP-AKG Director Col. Elmer Ragay, isang Chinese-led syndicate ang nasa likod ng krimen, at may koneksyon ito sa ibang kaso ng kidnapping. Pinaniniwalaang dating may-ari ng Philippine Offshore Gaming Operators (POGOs) ang pamilya ng bata, at malaki ang posibilidad na ang mga kidnappers ay dating POGO operators din. Dahil sa WeChat naganap ang negosasyon at Chinese ang ginamit nilang wika, tinawag ni Remulla itong isang "Chinese laban sa Chinese" na krimen.
Nadiskubre rin ng mga awtoridad na ang sindikatong ito ay gumagamit ng mga dating sundalo at pulis na AWOL (Absent Without Leave) bilang bodyguards. Alam na nila ang pagkakakilanlan ng mga ito ngunit hindi pa isinasapubliko. Sa kabila ng karumal-dumal na krimen, walang ransom na naibayad, at ligtas nang nakabalik ang bata sa kanyang pamilya.
