Pinuna ng mga senador ang Meta, dating Facebook, dahil sa mabagal nilang pagtugon sa mga fake at malicious posts. Isa sa mga tampok ay ang deepfake video ni Pangulong Ferdinand Marcos Jr. na kumakalat online nang mahigit isang linggo.
Berni Moestafa, Head ng Meta Public Policy para sa Philippines at Indonesia, sinabi na alam nila ang nasabing manipulated post. “For this particular content, I think it’s already been in process,” ani Moestafa sa pagdinig ng Committee on Public Information and Mass Media tungkol sa false content at fake news.
Hindi natuwa si Senator Raffy Tulfo, na nagsabing ang deepfake ay na-post noong Febrero 2. “Why not take it down immediately? Alam ninyo na ito ay lie at fake news. Bakit papayagan na ma-disrespect ang Presidente ng Pilipinas?” dagdag niya. Ayon kay Atty. Gio Tingson, Head ng Meta Public Policy Philippines, agad nilang tinanggal ang mga URLs matapos ma-report ng DICT, ngunit posibleng na-repost ito ng ibang account.
Nagreklamo rin si Tulfo tungkol sa mga peke niyang posts na hindi pa rin natatanggal kahit paulit-ulit na siyang nag-request sa Meta. Pinuna niya ang platform kumpara sa TikTok, na mas mabilis umano sa pagtanggal ng malicious content. Pinayuhan naman ni Senator Robinhood Padilla, chair ng committee, ang Meta na kumilos agad, lalo na’t ang bansa ay mataas ang political tension at pati ang Presidente ay nai-atake.
Ipinaliwanag ni DICT Secretary Henry Aguda ang business model ng Meta, kung saan mas mataas ang ad revenue kapag marami ang nanonood. “Kaya kapag 20 million followers, P20 million ang potential ad views,” paliwanag niya. Nagbigay din si Aguda ng suhestiyon tulad ng mandatory local legal presence, notice and action mechanism, at paglikha ng digital safety authority para masiguro ang proteksyon laban sa malicious content.
