Inilunsad ng G-SHOCK ang MRG-B2000KT-3A, isang limitadong edisyon na nagbibigay-pugay sa tradisyunal na sining ng Japanese metalsmithing. Bilang bahagi ng premium MR-G line, ang relo ay may bezel na hango sa tsuba o bakal na panangga ng espada, at mano-manong inukit ng beteranong maestro na si Kobayashi Masao—isang pangalan na kumakatawan sa husay at pamana.
Namumukod ang disenyo sa detalyadong phoenix na lumilipad, simbolo ng tibay, suwerte, at mahabang buhay. Ginamitan ito ng shishiai-bori na teknik para sa bas-relief lines, habang ang madilim na asul-berdeng kurogane-iro na kulay ay nakamit sa pamamagitan ng green DLC coating sa pinatigas na titanium. Dagdag pa rito, ang apat na turnilyo sa bezel ay may emerald na kumakatawan sa karunungan at katotohanan.
Sa aspeto ng performance, ang MRG-B2000KT-3A ay may case na may crystallized pattern na kahawig ng nie sa talim ng Japanese sword. Naka-equip ito ng dark green Dura Soft rubber strap na lumalaban sa mantsa at pagkupas—perpektong balanse ng tibay at karangyaan.
Hindi rin nagpahuli ang teknolohiya: may Tough Solar power, Bluetooth® smartphone linking, at radio-controlled time adjustment para sa eksaktong oras kahit saan. Ang kumbinasyon ng tradisyon at inobasyon ang nagbibigay sa relo ng tunay na karakter.
Limitado lamang sa 800 piraso sa buong mundo at may natatanging serial number bawat isa, ang relo ay may presyong $8,000 USD. Isang koleksiyon na idinisenyo para sa mga naghahanap ng prestihiyo, sining, at walang kapantay na kalidad sa isang pambihirang timepiece.
