Ang Bagyong Tino (Kalmaegi) ay patuloy na tumatawid sa Visayas habang may isa pang bagyong nabuo sa labas ng Philippine Area of Responsibility (PAR), ayon sa PAGASA ngayong Martes, Nobyembre 4, 2025.
Nananatiling nakataas ang Signal No. 4 sa ilang bahagi ng Visayas dahil sa malalakas na hangin na maaaring magdulot ng matinding pinsala sa buhay at ari-arian. Ayon sa PAGASA, magpapatuloy ang pagdaan ni Tino sa Western Visayas at hilagang Palawan bago ito lumabas ng bansa sa Huwebes, Nobyembre 6.
Bagaman humihina na, mananatiling nasa kategoryang typhoon si Tino. Samantala, isang low-pressure area sa labas ng PAR ang naging tropical depression, at patuloy itong mino-monitor ng mga weather experts.
Nagbabala rin ang PAGASA sa malakas na pag-ulan sa mga probinsya ng Palawan, Negros Occidental, Antique, Aklan, Iloilo, Guimaras, at Capiz na maaaring umabot sa higit 200 millimeters. Ang Cebu, Bohol, Mindoro, Siquijor, at Romblon ay maaari ring makaranas ng ulan mula 100 hanggang 200 millimeters.
May banta rin ng storm surge na maaaring umabot sa 3 metro sa mga mabababang lugar ng Masbate, Romblon, Mindoro, Palawan, Visayas Region, Dinagat Islands, at Camiguin. Pinapayuhan ang mga mangingisda at residente sa baybayin na umiwas muna sa dagat dahil sa malalaking alon na umaabot hanggang 6 metro.