Ang Bangko Sentral ng Pilipinas (BSP) ay nagtakda ng bagong limit sa cash withdrawals at iba pang malalaking cash transactions. Simula ngayong patakaran, hanggang ₱500,000 lang ang maaaring i-withdraw kada banking day kung walang dagdag na dokumento.
Nakasaad sa Circular 1218 na nilagdaan ni Governor Eli Remolona Jr. na ang lahat ng bangko at iba pang BSP-supervised financial institutions (BSFIs) ay kailangang magpatupad ng mas mahigpit na safeguards laban sa money laundering, terrorism financing, at paggamit ng illegal na pondo.
Kung lalampas sa ₱500,000 ang cash withdrawal o payout, ito ay dapat dumaan sa traceable channels tulad ng check payments, fund transfers, direct credit sa account, o digital platforms. Para sa cash transactions na lalagpas, kailangan ang enhanced due diligence (EDD) gaya ng karagdagang valid ID o patunay ng lehitimong negosyo.
Inatasan din ng BSP ang mga bangko na bantayang mabuti ang mga account, mag-file ng suspicious transaction reports, at i-review ang business relationship ng mga kliyente na hindi susunod sa EDD o may kahina-hinalang aktibidad.
Ayon sa BSP, bahagi ito ng kanilang hakbang matapos ang risk assessment na nagpakita ng mataas na peligro ng illegal cash flows sa malalaking transaksyon. Ang bagong patakaran ay epektibo 15 araw matapos mailathala sa Official Gazette o sa isang pahayagan.
