Ang Armed Forces of the Philippines (AFP) ay nagdeklara ng red alert status para sa mga protesta sa Setyembre 21. Ayon kay Col. Francel Margareth Padilla, ito ay tungkol sa readiness o kahandaan, at hindi agad na deployment. Naka-monitor 24/7 ang lahat ng units at handang tumulong sa PNP kung kinakailangan para mapanatili ang peace and order.
Itinanggi rin ng AFP ang alegasyon na ang red alert ay simula ng militarization. Binigyang-diin nila na ang pangunahing layunin ay kaligtasan ng sibilyan, respeto sa karapatang pantao, at pananatili ng kaayusan.
Samantala, inihayag ng PNP na magpapadala sila ng higit 50,000 pulis sa buong bansa upang magbantay sa protesta. Kabilang dito ang halos 10,000 sa mga visibility posts, 17,000 sa mobile patrol, 3,000 sa trapiko, 9,000 sa checkpoints, 6,000 sa crowd control, 4,500 sa Reactionary Standby Support Force, at 415 drone operators para sa aerial monitoring.
Paalala ng PNP, layunin ng malaking deployment na balansehin ang public safety at karapatan ng mamamayan na magpahayag. Hinikayat din nila ang mga raliyista na manatiling mapayapa at makipagtulungan sa awtoridad.
Ang kilos-protesta na tinatawag na Trillion Peso March Against Corruption ay gaganapin sa Setyembre 21, kasabay ng pag-alala sa deklarasyon ng Martial Law mahigit 50 taon na ang nakalipas. Sasalihan ito ng higit 55 civil society groups, 5 political parties, at 130 youth organizations na sabay-sabay magsisigaw ng, “Sobra na! Tama na! Ikulong na!”
