Ang Bureau of Internal Revenue (BIR) ay nagsampa ng 23 kaso laban sa 23 kumpanya, 56 opisyal ng kumpanya, at 17 accountant dahil sa hindi tamang pagbabayad ng buwis. Ayon sa BIR, bumili umano ang mga ito ng pekeng resibo o "ghost receipts" para makaiwas sa buwis.
Ang mismong BIR Commissioner na si Romeo Lumagui Jr. ang naghain ng reklamo sa Department of Justice (DOJ) noong Agosto 7. Sinabi niya na sangkot dito ang mga negosyo sa iba’t ibang industriya gaya ng construction, manufacturing, pagkain, electronics, entertainment, marketing, at retail.
Umabot sa ₱1.41 bilyon ang buwis na hindi nakolekta ng BIR dahil sa ilegal na transaksyon ng mga nasabing kumpanya. Dadaan muna ang mga reklamo sa masusing pag-aaral ng DOJ bago ito tuluyang isampa sa korte.
