Ang mga pensioner ng Social Security System (SSS) ay makakatanggap ng taunang dagdag sa kanilang buwanang pension simula Setyembre 2025 hanggang 2027. Ito ay bahagi ng isang malaking reporma upang matugunan ang matagal nang panawagan para sa mas mataas na benepisyo habang pinapanatili ang katatagan ng pondo.
Ayon sa anunsyo ng SSS noong Hulyo 31, aabot sa 3.8 milyon na pensioner ang makikinabang. Kabilang dito ang 2.6 milyon para sa retirement at disability at 1.2 milyon para sa survivor pensioners.
Magkano ang Dagdag sa Pension?
Simula Setyembre 2025, tataas ang pension ng:
10% para sa retirement at disability pensioners
5% para sa death o survivor pensioners
Taunang ipatutupad ang increase hanggang 2027, kaya compounding ang dagdag. Halimbawa, kung ang pension mo ay ₱2,200, magiging ₱2,420 ito sa Setyembre 2025. Sa 2026, aabot ito sa ₱2,662, at sa 2027, tataas pa sa ₱2,928.20 – 33% total increase mula sa dating halaga.
Bakit May Pagtaas?
Layunin ng repormang ito na mapagaan ang epekto ng inflation, dagdagan ang purchasing power ng mga pensioner, at pasiglahin ang ekonomiya. Tinatayang ₱92.8 bilyon ang papasok sa ekonomiya mula 2025 hanggang 2027 dahil dito.
Magandang balita rin na hindi tataas ang kontribusyon ng mga miyembro para pondohan ang dagdag benepisyo. Ang pagtaas ay sinuri sa pamamagitan ng actuarial studies para masigurong sustainable ang pondo ng SSS.
