Ang isang tricycle na kagagaling lang sa BJMP Teresa ay binulaga ng pamamaril sa Sitio Canlibot, Barangay Bagumbayan, Teresa, Rizal nitong Sabado ng hapon, Hunyo 7. Isa ang kumpirmadong patay—isang hindi pa nakikilalang babae—habang sugatan naman ang drayber at isa pang babaeng pasahero.
Galing daw sa pagdalaw ang babaeng tricycle driver sa kanyang asawang nakakulong, nang biglang harangin at pagbabarilin sila ng riding-in-tandem. Mabilis na tumakas ang mga suspek sakay ng motorsiklo. Ayon sa mga tanod na unang rumesponde, duguan na ang mga biktima nang sila'y datnan sa lugar.
Kuwento ni Cristituto Enriquez, tanod ng barangay, tinamaan sa panga ang isang babae, habang sa dibdib naman ang isa pa. Sa kabila ng tama, nagawa pang makatakas ng drayber at isa pang sakay. Kaagad naman silang isinugod sa ospital.
May mga residente rin na nakapansin ng dalawang kotse at isang motorsiklong tila sumusunod sa tricycle mula BJMP. Posible umanong sinundan ang mga ito hanggang sa barilan. Naging mabilis ang kilos ng mga sasakyan kaya hinalang may kinalaman sila sa insidente.
Patuloy ang imbestigasyon ng pulisya sa motibo ng krimen. Sa ngayon, puspusan ang pagtukoy sa mga suspek na kakasuhan ng murder at frustrated murder. Nakalabas na sa ospital ang drayber, habang nilipat sa ibang ospital ang isa pang sugatang babae.
