Ang isang senior high school graduate mula sa Manlapay, Dalaguete, Cebu ay naging usap-usapan online matapos niyang ibahagi ang isang napaka-touching na litrato kasama ang kanyang ama sa araw ng kanyang graduation. Si Guillerma Idias, 20 taong gulang, ay hindi mapigilan ang tuwa nang dumating ang kanyang ama, si Florentino Idias, 50, kahit ito’y galing sa trabaho, basa sa ulan, at nakasuot pa ng maruming damit.
Hindi inalintana ni Guillerma ang itsura ng kanyang ama. Sa kanyang Facebook post, ikinuwento niyang pinilit pa rin niyang magpakuha ng larawan kasama ito kahit tumanggi ang ama sa una dahil nahihiya sa suot niya. Sabi niya, “Wala koy paki di tika ikaulaw, Pa.”
Ayon kay Guillerma, isa siyang working student na pursigidong makatapos ng pag-aaral para makatulong sa pamilya. Gusto niyang maging guro balang araw upang mas mapagaan ang buhay ng kanyang mga magulang at matulungan din ang kanyang mga kapatid sa kanilang pag-aaral.
Ang simpleng larawan ay naging simbolo ng sakripisyo at pagmamahal ng isang ama para sa anak. Sa ngayon, umani na ito ng higit 139,000 likes at 26,400 shares sa social media.
Tunay ngang ang tagumpay ni Guillerma ay hindi lamang para sa sarili, kundi para sa pamilyang buong pusong sumuporta sa kanya — lalo na ang ama niyang basang-basa ngunit buong tapang na dumalo.
