Ang Bureau of Immigration (BI) ay nagsagawa ng operasyon sa Bonifacio Global City, Taguig noong May 29, kung saan 39 na Chinese nationals ang inaresto. Sila ay konektado sa isang kilalang telecommunications company.
Ayon sa BI, ang mga dayuhang ito ay walang wastong travel documents, at lumalabag sa mga patakaran sa imigrasyon ng bansa. Bagama’t may hawak silang work visa, ang mga ito ay inilabas sa ibang kumpanyang hindi na nila pinagtatrabahuhan.
Sinabi ni BI Commissioner Joel Anthony Viado na ang sinumang dayuhan na gustong magtrabaho sa Pilipinas ay kailangang sumunod sa batas at tamang proseso. Binalaan niya rin ang mga nagpapalit ng employer nang walang tamang pahintulot.
Ang operasyon ay isinagawa ng BI Intelligence Division sa tulong ng PNP Southern Police District. Ang mga inaresto ay dinala na sa BI detention facility sa Bicutan, habang hinihintay ang kanilang deportation proceedings.
Ayon pa kay Commissioner Viado, ang hakbang na ito ay malinaw na mensahe na hindi palalagpasin ng BI ang sinumang lalabag sa batas pang-imigrasyon at pambansang seguridad.
