Ang dalawang tao ay nasugatan matapos makarinig ng putok ng baril malapit sa polling center sa Bangued, Abra ngayong Lunes. Ayon sa pulisya, nangyari ang insidente bandang alas-7 ng umaga sa Sagap Elementary School, kung saan pansamantalang nahinto ang botohan.
Ayon kay PLt.Col. Daniel Pel-ey ng Abra police, may kaguluhan sa lugar kaya kinailangan ng mga pulis na pakalmahin ang sitwasyon. Maya-maya ay nakarinig umano ng putok sa may ilog, daan papuntang paaralan. Ilang residente ang nakakita ng dalawang sasakyang nagmadaling bumiyahe papuntang Bangued proper.
Kinumpirma ng Seares Memorial Hospital na may dalawang pasyente silang tinanggap na may sugat ng bala, ngunit sila ay nasa stable na kalagayan. Patuloy pa ang imbestigasyon sa nangyaring insidente.
Naituloy rin ang pagboto sa Sagap Elementary School bago magtanghali. Ngunit may ilang botante ang umuwi na lang sa takot. Ayon kay Nieves Berami, sunod-sunod ang putok kaya dali-dali siyang sumama sa kanyang asawa habang nagtatakbuhan ang mga tao.
Umapela si M/Gen. Ronnie Francis Cariaga, acting Task Force Abra commander, na huwag magpakalat ng maling impormasyon o fake news upang maiwasan ang lalong pagkalito at takot. Nauna nang nasunog ang Dangdangla Elementary School, isa ring voting center sa Bangued, ilang araw bago ang eleksyon, pero walang nasirang gamit pang-eleksyon.
