Nakatukoy na ang biktima sa nakalap na hiwa-hiwalay na katawan sa loob ng blue drum sa Binondo, Manila, ayon sa ulat ng National Capital Region Police Office (NCRPO). Ayon kay NCRPO spokesperson Maj. Hazel Asilo, ang biktima ay isang Chinese national at kaibigan ng pangunahing suspek.
Ayon sa pahayag ni Asilo, “‘Yung victim natin ay kinilala ng live-in partner ng primary suspect. Nakilala siya sa kanyang ID at sa mga larawan mula sa Manila Police District.” Batay sa testimonya ng isang saksi, matagal na magkakilala ang biktima at ang suspek, higit sa dalawang taon, at magkaibigan at business partner umano sila.
Nakikipag-ugnayan na rin ang pulisya sa Chinese Embassy upang kumpirmahin kung gaano na katagal naninirahan ang biktima sa Pilipinas at alamin ang iba pang detalye sa kanyang background. Sa condominium unit, may isa lamang rehistradong tenant kasama ang pangunahing suspek, habang tatlo pang Chinese nationals ang naitalang naninirahan doon.
Ayon sa pulisya, ang biktima ay nanatili rin sa unit ngunit hindi opisyal na naideklara sa management. Pinaniniwalaang may kinalaman sa utang o pera ang motibo sa brutal na krimen, ngunit patuloy pang iniimbestigahan ang eksaktong halaga at ang mga pangyayaring humantong sa insidente. Ang apat pang Chinese nationals ay kasalukuyang sinampahan ng kaso ng murder.
Wala pang kamag-anak na nagpakilala sa katawan ng biktima na kasalukuyang nasa kustodiya ng isang funeral parlor na inasikaso ng Manila Police District. Ayon sa pulisya, mananatili sa funeral home ang katawan hanggang sa opisyal na ma-claim ito ng pamilya o legal na kamag-anak.
