Inaresto ng Bureau of Immigration ang isang Chinese national dahil sa umano’y identity theft at iba pang paglabag sa batas ng imigrasyon sa isinagawang operasyon sa Parañaque City noong Pebrero 16. Ayon sa opisyal na pahayag, isinagawa ang operasyon sa isang condominium unit sa Barangay Tambo kung saan naaresto ang 36-anyos na si Fang Li.
Batay sa ulat ng intelligence, sangkot umano si Fang sa mga iligal na aktibidad sa lokal na komunidad at ginagamit ang pagkakakilanlan ng isa pang Chinese national upang makaiwas sa awtoridad. Ipinakita ng mga rekord na pumasok siya sa bansa noong 2022 bilang temporary visitor, ngunit nabigong magpa-extend ng kanyang visa, dahilan upang siya ay maituring na overstaying alien.
Sa parehong operasyon, nadakip din ang dalawa pang Chinese nationals. Ang 38-anyos na si Chen Youliang ay natukoy bilang isang undocumented alien at may aktibong Blacklist Order. Samantala, ang 39-anyos na si Xu Yuxiang ay kumpirmadong nag-overstay matapos mapaso ang kanyang huling visa extension noong 2020. Ang tatlo ay kasalukuyang nakapiit sa warden facility ng Bureau of Immigration habang hinihintay ang kanilang deportation proceedings.
